Pas fillimit të sezonit me fitore, Struga Trim Lum është gati edhe për një fitore tjetër në kampionat, këtë herë ndaj Besës së Dobërdollit…
Struga është gati për të mirëpritur të dielën edhe Besën e Dobërdollit në stadiumin e qytetit, teksa skuadra e Qatip Osmanit shihet të jetë e uritur për të regjistruar edhe fitoren e dytë rradhazi, pas asaj ndaj Tikveshit në sezonin e ri.
Do të jetë kjo ndeshja e parë zyrtare ndaj skuadrës nga Dobërdolli, që për herë të parë po luan në elitën e futbollit vendor.
Atmosfera në skuadër është në nivelin e duhur, ndërsa javën që lamë pas skuadra përveç që ka kryer me përpikmëri seancat stërvitore, të njëjtën e ka shfrytëzuar edhe për relaks, duke shijuar bukuritë e Strugës dhe liqenit.
Drejtësinë në ndeshjen e së dielës do ta ndajë Stojançe Trpçevski nga Kavadari, ndërsa treshja tjetër e arbitrëve nga vijnë nga Kërçova, me asistentin e parë Kushtrim Lika, të dytin Davor Cvetanoski dhe ndihmësin Aleksandar Grujoski.
FORMACIONI
Në ndeshjen e javës së kaluar kundër Tikveshit, trajneri Qatip Osmani, ju dha mundësinë 8 prej gjithsej 9 blerjeve të reja gjatë merkatos së verës. I vetmi që nuk debutoi ishte portieri Hristijan Stevkovski.
Lidhur me transferimet e reja, trajneri Osmani kishte thënë: “Në këtë periudhë dy muajshe sa jemi bashkë, mund të them se e kanë gjetur veten, mirëpo disave prej tyre mendoj se ju duhet edhe pak kohë në aspektin e njoftimit të ekipit, me njoftimin e individit, ashtu që shpresojmë se edhe ata shumë shpejtë do vinë në shprehje dhe se do të kontribuojnë për skuadrën”.
Edhe në ndeshjen e së dielës, nuk pritet të ketë shumë ndryshime në formacion, kjo falë buletinit mjekësor të skuadrës, që nuk njeh ndonjë futbollistë të dëmtuar, por gëzon fakti që nuk kemi as edhe futbollistë të pezulluar.
TRANSMETIMI I NDESHJES
Ndeshja ndërmjet Struga Trim Lum dhe Besës së Dobërdollit në program është të dielën me fillim në ora 17:00. Për gjithë ata futbolldashës dhe tifoz të skuadrës tonë që nuk do të mund të jenë prezent në stadium, e në veçanti ata tifoz nga Diaspora, ju bëjmë me dije se ndeshjen kundër skuadrës nga Dobërdolli do të mund ta ndiqni në kanalin zyrtarë të FFM-së në youtube.
