Një ditë spektakolare mund të përfundonte vetëm në një mënyrë – me një fitore spektakolare në transfertën në Shkup ndaj Rabotniçkit…
Sot ekipi u rikthye në fushën e blertë pas pauzës ndërkombëtare, ku pjesë e ekipeve përfaqësuese të vendit, ishin edhe tre futbollistët tanë, Bojan Ilievski (ekipi A i Maqedonisë) si dhe Memetriza Hamza dhe Shaban Zenku (ekipi U21 i Maqedonisë).
Këta dy të fundit ndeshjen e nisën nga stoli, duke u inkuadruar në lojë vetëm në pjesën e dytë, derisa Ilievski ishte startues, madje duke asistuar edhe në golin e dytë të shënuar nga Hristijan Maleski.
Ndryshe Struga Trim Lum në transfertën e sotme në Shkup përballë Rabotniçkit regjistroi fitore 3:1, duke vazhduar luftën e ashpër për kreun e tabelës.
Si duket futbollistët tanë mezi kishin pritur rikthimin në skenën e futbollit vendor pas pauzës ndërkombëtare, duke treguar edhe një performancë të shkëlqyer këtë edicion në Ligën e Parë në ndeshjet në transfertë, ku numërojmë 4 fitore dhe vetëm një barazim.
DY GOLA BRENDA 20 MINUTAVE
Pas gjithë atyre emocioneve të përgatitjeve për ndeshjen e sotme, skuadra e etur për futboll reagoi shumë mirë në fushën e blertë të stadiumit “Petar Milloshevski” pranë FFM-së, duke shënuar dy gola brenda 20 minutave të para. Ishte rasti i Marjan Radeskit në minutën e 8-të që paralajmëroi golin e parë të këtij takimi, që erdhi në minutën e 11-të.
Maleski nga e djathta harkoi për tokë pranë vijës së 16-të metërshit të skuadrës vendase, aty ku kapiteni kundërshtarë, Demiri, devijoi topin vetëm deri te këmbët e Jevtoskit, që nuk fali dhe me një goditje të fuqishme kaloi në epërsi Struga Trim Lum.
Vetëm 10 minuta më vonë, Struga Trim Lum dyfishoi epërsinë ndaj “romantikëve”. Ilievski bukur pasoi për Maleskin brenda zonës, ndërsa ky i fundit me një goditje të fuqishme me të djathtën e tij shënoi edhe golin e dytë në rrjetën e Vasilev.
Festë e merituar në mesin e futbollistëve tanë që zhvilluan një pjesë të parë shumë të mirë, në të cilën dominuam në tërësi, kjo falë edhe punës së palodhshme të treshes së mesfushorëve tanë, Bojku, Shabani dhe Jevtoski.
DY SHTYLLA DHE NJË GOL NË PJESËN E DYTË
Edhe pjesën e dytë skuadra jonë e nisi furrishëm. Madje në këtë pjesë shumë pak mungonte që të shënonim ende pa përfunduar minuta e parë, kur Maleski nga brendia e zonës goditi shtyllën.
Ky rast i humbur na kushtoi, pasi në aksionin e parë më serioz në pjesën e dytë, Rabotniçki ngushtoi epërsinë në 1:2 falë golit të Trajkov, që përfitoi nga harkimi i Kadriut.
Megjithatë, kur në skuadër ke lojtar të kalibrit si Shabani, Radeski, Bojku, e Jevtoski, skuadra vazhdoi minutat në vijim me shumë qetësi, duke kontrolluar mesin e fushës, e herë pas herë duke tentuar golin kundërshtarë.
Në një rast të tillë, një top për Radeskin në hyrje të zonës kundërshtare, bëri që Mecinoviq të ndërhyjë ndaj sulmuesit tonë, ndërsa arbitri kryesor pas konsultimit me dhomën VAR, vendosi të tregojë në pikën e bardhë.
Përgjegjësinë për herë të parë këtë edicion për të goditur topin nga vija e 11-të metërshit e morri kapiteni Bunjamin Shabani, i cili nuk gaboi dhe në minutën e 70-të riktheu epërsiën e dy golave, këtë herë për rezultat 3:1 në favorin e Struga Trim Lum.
Pasuan dy tentativa të tjera përmes Maleskit dhe Shabanit, mirëpo në të dyja rastet portieri vendas Vasilev ishte më i shpejtë se futbollistët tanë, duke i mbuluar para kohe.
Rastin më të mirë deri në fund të takimit për të shënuar edhe një gol tjetër e regjistrojmë në minutën e 78-të, por Hamza në këtë rast doli të jetë i pafat, pasi shtylla i mohoi golin.
NDESHJA E RRADHËS
Fundjavën e ardhshme rikthehemi të luajmë në Strugë, aty ku do të mirëpresim Bashkimin. Do të jetë kjo ndeshja e parë historike në kuadër të Ligës së Parë me vëllezërit tanë nga Kumanova që do të zhvillohet buzë liqenit.
Ndeshja në fjalë në program është me datë 30 nëntor me fillim në ora 13:00.
RABOTNIÇKI – STRUGA TRIM LUM 1:3
Autorë të golave: S. Jevtoski 11’, H. Maleski 21’, B. Shabani 70’ (pen.)
Stadiumi Petar Milloshevski – Shkup (FFM)
Shikues: 200
Arbitër kryesor: Nderim Tefiku
Kartonë të verdhë: B. Ilievski, K. Mazoulouxis
FORMACIONI:
M.Angeletti, B. Ilievski, J. Maudo, K. Mazoulouxis, P. Fall (G. Mici 85’), S. Jevtoski (L. Diako 70’), B. Bojku, B. Shabani (Sh. Zenku 85’), F. Roçi (M. Hamza 65’), H. Maleski, M. Radeski (A. Vosha 85’);
Trajner: Bledi SHKËMBI
