Të shtunën në terren vendas do të mirëpresim AP Brera. Në prag të këtij takimi nga tabori i skuadrës tonë ka folur kapiteni, Bunjamin Shabani, i cili pranon se forma e skuadrës nuk është në nivelin e duhur, mirëpo me rëndësi janë fitoret. Pikërisht edhe nesër ekipi do të kërkojë fitoren e rradhës që do të ishte e mirëseardhur në prag të pauzës dy javore që pason…
Kapiteni Bunjamin Shabani ka dhënë opinionin e tij në prag të takimit të nesërm kundër AP Brera. Është kjo ndeshja e tretë që do ta zhvillojmë në terren vendas, me shpresë se do ta mbyllim sikurse edhe dy ndeshjet e para, me tre pikë të plota.
“Ndeshje e rëndësishme për ne. Duhet ta pranojmë se luajmë ndaj një skuadre kualitative, mirëpo neve pas disfatës në xhiron e fundit kundër Rabotniçkit jemi përgatitur maksimalsht dhe se do të bëjmë çmos që të ju rikthehemi fitoreve.”
Përveç golave, skuadrës po i mungojnë edhe rastet e krijuara para portës kundërshtare.
“Më e rëndësishme është të fitohen ndeshjet. Mendoj se ndryshimet e shumta në skuadër mund të jenë një nga arsyet, ashtu që na duhet edhe pak kohë, dhe besoj se rastet dhe golat nuk do të na mungojnë.”
Shabani beson te ekipi, duke potencuar se nga ndeshja në ndeshje forma e ekipit do të përmirësohet dhe se do të arsyetojmë epitetin e kampionit.
“Ekipi ka forcë dhe kualitet. Thjesht na duhet kohë për të treguar para publikut më të mirën. Mendoj që ndeshje pas ndeshje foma e ekipit do të ngritet dhe se do të bindim të gjithë se jo rastësisht kemi epitetin e kampionit”.
Pas ndeshjes së nesërme kundër AP Brera, që starton në ora 16:00, pason një pauzë dy javore, që do të jetë e mirëseardhur për ekipin.
