Fitore 3:1 në Shkup përballë Vardarit, me të cilën skuadër e mbyllim në mënyrën më të mirë muajin nëntor. I mundëm 4:0 me datë 01 nëntor në Strugë, ndërsa i mundëm edhe sot në Shkup….
Struga Trim Lum ka mundur Vardarin në udhëtim me shifrat 3:1, duke u rikthyer sërish tek fitorja, që na mbanë në vetë kreun e tabelës. Ishte kjo fitorja e 10-të sezonale, që konfirmimin e morri vetëm pas 12 minutave të para, kur shënuam dy gola në rrjetën e vendasve.
Ishte Vangjel Zguro që hapi serinë e golave në këtë ndeshje, kur doli të jetë i saktë nga penaltia që në minutën e 6-të.
Nuk vonoi shumë dhe 6 minuta më pas, me anë të Hadis Tairit dyfishuam shifrat, duke bërë që në ato momente të jemi zotërinjtë e vërtetë në fushën e blertë në kompleksin pranë FFM-së, aty ku vazhdimisht nga tribunat dëgjoheshin sharje në adresë të futbollistëve tanë, por mbi të gjitha edhe ofendime në bazë nacionale.
Megjithatë falë profesionalizmit të lartë të futbollistëve tanë së bashku me stafin teknik, nuk erdhi deri te ndonjë incident, edhe pse brenda kësaj periudhe regjistruam disa kartonë të verdhë dhe shumë nervozizëm, sidomos në bankinën e skuadrës vendase, që reaguan pas festës së Vangjel Zguro, pasi i njëjti kishte shënuar golin e epërsisë.
Ndryshe pjesa e parë dhuroi edhe një gol tjetër, këtë herë për ekipin vendas, që shënuan nga pika e bardhë me anë të Milosaviq.
Kështu me shifrat 2:1, u mbyll pjesa e parë, ndërsa në të dytën skuadra jonë që nga fillimi morri kontrollin e lojës sërish, duke mos lejuar në asnjë moment kundërshtarin të vie në shprehje.
Vetëm pas tre minutave lojë në këtë pjesë, sulmuesi Bassirou Compaore ishte shumë pranë golit, mirëpo intervenimi i Gaçevskit, nuk lejoi gëzimin e sulmuesit tonë nga Burkina Faso.
Vetëm një minutë më pas, edhe mbrojtësi Mexhit Neziri tentoi të mposht Gaçevskin, mirëpo ky i fundit sërish doli fitues, duke bërë që në ato momente të luaj rolin e heroit te Vardari, pasi arriti që të ndalë edhe goditjet e rrezikshme në minutat në vijim të kapitenit Bunjamin Shabani, pas atij kombinimi të dyfishtë me Besmir Bojkun, por edhe të Vangjel Zguros nga goditja e dënimit.
Gjithë këto raste të njëpasnjëshme para portës së vendasve, ishin paralajmërim për golin e tretë, që erdhi në minutën e 62-të, e ku punën më të madhe e kreu kapiteni Shabani, i cili fillimisht doli fitues përballë dyshes mbrojtësve të Vardarit, që më pas të servojë një top për Compaore, që nuk e kishte të vështirë të shënojë për rezultat 3:1.
Compaore dy minuta pas golit të tij të parë në këtë ndeshje, kishte mundësinë të shënojë edhe një tjetër, mirëpo nuk ishte i vëmendshëm para portës së vendasve.
Pasuan disa zëvendësime nga të dyja palët, me Duron, që në këtë ndeshje provoi të luaj me një skemë pak më ndryshe nga herave tjera, kjo edhe për shkak mungesës së Besart Ibraimit në krye të sulmit, por edhe qendërmbrojtësit Sava Radiç, që vazhdon rikuperimin.
Kështu, menjëherë para portierit Qoshevski, u reshtuan Neziri, Krivanjeva dhe Zguro, që kishte detyra më difenzive, ndërsa nga krahët funksionuan Maliqi dhe Hadis Tairi. Hogan Ukpa vepronte në qendër të mesfushës, i ndihmuar nga dyshja e palodhshme, Shabani dhe Bojku, ndërsa partner i Marjan Radeskit në vijën e sulmit ishte Compaore, i cili u gjind mirë edhe në këtë rol, pavarësisht se ndeshjeve tjera i njëjti provohej edhe si sulmues krahu.
Gjatë pjesës së dytë nuk munguan hapësirat edhe për Kasamin, Jahjën, Flamur Tairin dhe Jaroviç, i cili në 7 minutat e fundit të takimit udhëhoqi sulmin e skuadrës tonë.
ZGURO FESTOI ME SHQIPONJË NË NDER TË 28 NËNTORIT
Vangjel Zguro ishte futbollisti që hapi serinë e golave në takimin e sotëm kundër Vardarit. I njëjti shënoi vetëm pas 6 minutave lojë, kur shënoi nga pika e bardhë, ndërsa festa e tij, edhe pse ishte shumë e zakonshme për të, pasi i njëjti gjithnjë golat e tij i feston me Shqiponjë, bëri shumë bujë në mesin e tifozëve vendas dhe tek bankina e vendasve.
Një gjest jo i mirë dhe pa aspak sportivitet nga ana e vendasve, kjo duke pasur parasysh se Zguro një gjë të tillë bëri edhe për nder të festës së flamurit, 28 Nëntorit, festë së mbarë shqiptarëve.
HADIS TAIRI SHËNON GOLIN E PARË ME STRUGA TRIM LUM
Dita e sotme doli të jetë shumë pozitive për futbollistin 18-vjeçar, Hadis Tairi. Mbrojtësi i krahut të majtë ishte i pandalshëm në takimin e sotëm, duke qenë një ndër futbollistët më të mirë në terren. I njëti përfitoi penaltinë, përmes së cilës krijuam epërsinë, ndërsa gjithashtu u regjistrua edhe në listën e golashënuesve.
Për Hadisin ishte ky goli i parë në një ndeshje zyrtare me fanellën e Struga Trim Lum, dhe me siguri se i njëjti datën e sotme do të mbajë mend gjatë kohë, kjo edhe falë performancës së dhuruar për gjatë 90 minutave.
________________________________________________________________________________________________________________
VARDARI – STRUGA TRIM LUM 1:3
Stadiumi pranë FFM-së – Shkup
Shikues: 700
Autorë të golave:
M. Milosaviq 32’ (Vardar) – V. Zguro 6’ (pen.), H. Tairi 12’ B. Compaore
Kartonë të verdhë:
Vardari: D. Velkovski, V. Brdarovski, F. Duranski, A. Omeragiq, K. Nikolovski, D. Glishiç
Struga Trim Lum: V. Zguro, H. Ukpa, H. Tairi
________________________________________________________________________________________________________________
Arbitër Kryesor: Krumisllav Gjorgiev (Shtip)
Ndihmës i parë: Darko Jovçevski (Tetovë)
Ndihmës i dytë: Aleksandar Gjorgjeski (Tetovë)
Arbitër i katërt: Furkan Idrizi (Tetovë)
Delegat i takimit: Toni Donev (Valandovë)
________________________________________________________________________________________________________________
FORMACIONET:
Vardari: F. Gaçevski, V. Brdarovski, N. Mishkovski, D. Glishiç, F. Duranski, M. Lemos, M. Milosaviq, K.Nikolovski, D. Vekovski, H. Veceski, A. Omeragiq
STRUGA TRIM LUM: V. Qoshevski, M. Neziri, B. Krivanjeva, V. Zguro, E. Maliqi, H. Tairi, H. Ukpa (S. Jaroviç), B. Shabani, B. Bojku (F. Tairi), M. Radeski (A. Kasami), B. Compaore (A.Jahja)
________________________________________________________________________________________________________________
