Një ditë spektakolare mund të përfundonte vetëm në një mënyrë – me një fitore spektakolare 6:0 ndaj Bashkimit në qytetin tonë të bukur të Strugës…
Dita e bukur në Strugë, ku herë pas here buzëqeshnin edhe rrezet e diellit, u kurorëzua me një fitore të thellë 6:0 ndaj Bashkimit. Futbollistët tanë në këtë ndeshje dhanë një nga performancat e tyre më bindëse të sezonit, duke mposhtur për herë të dytë këtë edicion me një fitore të thellë skuadrën nga Kumanova, pas asaj fitore 5:0 në transfertë.
Serinë e golave në takimin e sotëm e nisi Bunjamin Shabani, pasi paraprakisht ishte anuluar një gol i Hristijan Maleskit, që ndeshjen e mbylli me dy gola, ndërsa nga një gol tjetër shtuan edhe Stefan Jevtoski, Memetriza Hamza dhe rezervisti, Arbi Vosha.
3 GOLA BRENDA 45 MINUTAVE, POR EDHE SHUMË RASTE TË KRIJUARA
Ndeshja pati një fillim relativisht të qetë dhe u deshën 11 minuta që të krijohej rasti i parë i qartë. Hamza harkon brenda zonës, aty ku Pape Fall tenton me kokë, mirëpo pa arritur të shënojë.
Në aksionin e rradhës, Pape Fall ishte në rolin e asistuesit, kur mjaft mirë gjeti në zonë Radeskin, mirëpo edhe goditja e këtij të fundit nuk ishte precize.
Në minutën e 22-të, topi u pa në rrjetën e portierit mysafir Stojkovski, mirëpo i njëjti në fund buzëqeshi, pasi goli i Maleskit u anulua për pozicion jashtëloje.
Megjithatë, goli erdhi shumë shpejtë dhe buzëqeshja u zhduk shumë shpejtë tek portieri mysafir, që u mposht nga kapiteni ynë, Bunjamin Shabani.
Ky i fundit pas një kombinimi të dyfishtë me Radeskin, doli i vetmuar para portës së mysafirëve dhe nuk fali, duke shënuar për 1:0.
E gjithë kjo ndodhi në minutën e 24-të, ndërsa në minutën e 37-të, rezultati veçmë ishte 2:0. Asistuesi më i mirë i kampionatit, Pape Fall, nga e majta bukur gjeti brenda 5-metërshit të portierit mysafir, Hristijan Maleskin, i cili nuk fali dhe në ato momente shënoi për 2:0.
Vetëm dy minuta më vonë, Radeski ishte shumë afër golit, mirëpo goditjen e tij nga vija fatale e golit në rivënie nga këndi e dëboi mbrojtësi i Bashkimit, Esmin Liçina.
Pas ekzekutimit të rivënies nga këndi, edhe Maleski tentoi me kokë, mirëpo edhe njëherë tjetër reagon mbrojtja mysafire, duke mos lejuar që topi të kaloj vijën fatale.
Momenti më i bukur i 45 minutave të para ndodhi në minutën e 40-të, kur Stefan Jevtoski shënoi një super gol me një goditje nga jashtë zonës, duke kurorëzuar me gol harkimin e saktë të Memetriza Hamza, direkt nga goditja e këndit.
Hamza në minutën e fundit të pjesës së parë tentoi që të shënojë nga distanca, mirëpo nuk ishte i saktë, derisa në aksionin e fundit të kësaj pjese, tentativa e Bojkut u bllokua nga mbrojtja mysafire.
SUPER GOLA NGA HAMZA DHE MALESKI
Pjesa e dytë nisi me të njëjtin ritëm. Madje në këtë pjesë shënuam shumë më herët. Vetëm pas 3 minutave të kaluara, pas një goditje dënimi të shkaktuar jashtë zonës, në skajin e saj të djathtë, Memetriza Hamza u vendos pas topit, duke marrë përgjegjësinë për të goditur, ndërsa një gjë të tillë bëri në mënyrë maestrale, duke shënuar edhe golin e katërt në rrjetën e Bashkimit.
E majta e tij, edhe njëherë tjetër doli të jetë e artë, pasi i njëjti në këtë mënyrë shënoi edhe golin e dytë nga gjuajtja e lirë, njëjtë sikurse që kishte bërë edhe ndaj Sileksit.
Një avantazh shumë i lartë, që bënte të besonim tek fitorja që në ato momente. Megjithatë, ekipi nuk u shpërqëndrua në asnjë moment, duke vazhduar me të njëjtin ritëm edhe në minutat në vijim.
Kësisoj në minutën e 61-të, Hristijan Maleski, me të djathtën e tij nga vija e jashtme e 16-të metërshit shënon një super gol për rezultatin 5:0. Ishte ky goli i dytë personal për Maleskin, dhe njëherit i 8-ti në kampionat.
Në minutën e 72-të, në skenë doli edhe rezervisti Arbi Vosha, që mjaft bukur depërtoi nga krahu i majtë, duke rrezikuar portierin mysafir, i cili me këmbë devijoi topin në rivënie nga këndi.
Arbi Vosha, atë që nuk e bëri në të 72-tën, e bëri në minutën e 85-të, kur shënoi për 6:0. Shkupjani, pasi fitoi një duel me Filip Aleksovskin, me hapa të shpejtë u fut brenda zonës kundërshtare, duke shënuar edhe golin e 6-të në rrjetën e Stojkovskit.
FITORJA MË E THELLË NË HISTORI
Fitorja 6:0 ndaj Bashkimi ishte më e thella në historinë e Struga Trim Lum në ndeshjet e Ligës së Parë. Një sezon ky mjaft i mbarë, në të cilin gjithashtu kemi regjistruar edhe dy fitore të tjera të thella (5:0), që të dyjat në transfertë.
Fillimisht me 30 gusht në Kumanovë, po ndaj të njëjtit kundërshtarë, Bashkimit dhe më pas kundër Makedonija GJ.P në Shkup me datë 21 tetor, kur luajtëm në kuadër të 1/8 së finales së Kupës së Maqedonisë.
MINUTAT E PARA PËR ALTIN ALIJIN
Minutat e para këtë edicion me fanellën e Struga Trim Lum, i përjetoi edhe 19-vjeçari Altin Aliji. Bëhet fjalë për një sulmues të talentuar, i cili sot kundër Bashkimit luajti pak më shumë se 15 minuta, kur zëvendësoi pikërisht autorin e dy golave, Hristijan Maleski.
STRUGA TRIM LUM – BASHKIMI 6:0
Autorë të golave: B. Shabani 24, H. Maleski 37, 61, S. Jevtoski 40’, M. Hamza 48’, A. Vosha 85’
Stadiumi i qytetit: Strugë
Shikues: 300
Arbitër kryesor: Aleksandar Grujoski
Kartonë të verdhë: G. Mici
FORMACIONI:
M. Angeletti, B. Ilievski, J. Maudo, K. Mazuluksis, J. Maudo (G. Mici 65’), P. Fall, S. Jevtoski (L. Diako 46’), B. Bojku (F. Roçi 65’), B. Shabani (A. Vosha 65’), M. Hamza, M. Radeski, H. Maleski (A. Aliji 73’);
Trajner: Bledi SHKËMBI
