Bledi Shkëmbi: Jam i kënaqur me fitoren dhe kontributin e futbollistëve

Trajneri Bledi Shkëmbi gjithashtu foli edhe performancën e shkëlqyer të sulmuesit nën hije, Hristijan Maleski, që po e shfrytëzon në maksimum mundësinë e dhënë…

Bledi Shkëmbi kishte shumë arsye të festonte sot pas fitores 3:1 në udhëtim ndaj Rabotniçkit në Shkup. Skuadra reagoi shumë mirë, sidomos në pjesën e parë, ndërsa e gëzon fakti se futbollistët po japin më të mirën në fushën e blertë, ndërsa gjithashtu edhe gjatë seancave stërvitore, ku tregohen shumë korrekt.

Ai gjithashtu foli edhe performancën e shkëlqyer të sulmuesit nën hije, Hristijan Maleski, që po i shfrytëzon në maksimum minutat e dhëna nga ana e trajnerit.

“Mendoj që bëmë një pjesë të parë shumë të mirë, ku arritëm të shënojmë dy gola. Pjesën e dytë e nisëm pak të përgjumur dhe kundërshtari arriti të shkurtojë diferencën. Më pas u rikthyem në lojën tonë dhe mendoj që e merituam plotësisht fitoren.” – u shpreh trajneri Bledi Shkëmbi, që foli edhe për procesin e përgatitjeve në prag të këtij takimi, e ku për shkak pauzës ndërkombëtare, lojtarët në disponim kishin më shumë ditë.

“Pauza për disa lojtarë bëri mirë, por për fat të keq kushtet e motit na e vështirësuan pak përgatitjet e javës” – deklaroi Shkëmbi.

Ai është i kënaqur me performancën e futbollistëve, si për gjatë ndeshjeve, po ashtu edhe në stërvitje.

“Jam shumë i kënaqur me futbollistët, jo vetëm me ndeshjen e sotme, por gjatë gjithë kohës në mënyrën se si stërviten dhe korrektësinë që kanë” – tha Shkëmbi, që nuk la pa përmendur edhe formën e mirë të sulmuesit, Hristijan Maleski.

“Maleski është një vlerë e shtuar e jona në repartin e sulmit dhe çdo herë që i jepet mundësia të luajë po e shfrytëzon në maksimum në të mirë të skuadrës.” – mbylli intervistën e tij trajneri Bledi Shkëmbi, që pa dyshim se është një ndër trajnerët më të suksesshëm të skuadrës tonë, bazuar në rezultatet e deritanishme.

Nën drejtimin e tij, Struga Trim Lum në 14 ndeshje kampionale ka regjistruar 11 fitore, 2 barazime dhe vetëm 1 disfatë, ndërsa gjithashtu regjistroi një fitore të thellë 5:0 kundër Makedonija GJ.P në kuadër të ndeshjeve të Kupës.